काठमाण्डौ,११ साउन ।
प्रमुख चार दलले भोलीबाट संविधान निर्माणका क्रममा असन्तुष्ट दलहरुसँग छलफल थाल्ने भएका छन् ।
संविधानसभा भित्र रहेको राप्रपा नेपाल, केही मधेश केन्द्रित दल तथा संविधानसभा बाहिर रहेको नेकपा माओवादीसँग घनीभूत छलफल गर्ने चार दलको तयारी छ ।
प्रधानमन्त्री निवास वालुवाटारमा साँझ बसेको नेपाली कँग्रेस, एमाले, एकीकृत माओवादी र मधेशी जनअधिकार फोरम लोकतान्त्रिकको बैठकले संविधानसभा भित्र र बाहिर रहेका असन्तुष्ट दलसँग गंभिर वार्ता गर्ने निर्णय गरेको हो ।
बैठकपछि एकीकृत माओवादी उपाध्यक्ष नारायणकाजी श्रेष्ठले उनीहरुसँगको छलफलपछि प्राप्त सुझावलाई आधार बनाई मस्यौदा परिमार्जनको काम थाल्ने निर्णय भएको जानकारी दिनुभयो ।
यसैबीच आजको बैठकमा प्रमुख सचेतकहरुले भावी संविधानको मस्यौदामा जनताबाट प्राप्त सुझावलाई समेटी ७ बुँदे प्रतिवेदन प्रस्तुत गरेका थिए ।
चार दलका चार जना प्रमुख सचेतक सदस्य रहेको कार्यदलले प्रत्यक्ष निर्वा्चित कार्यकारी प्रमुख, सीमाङ्कन, सीमान्तकृत समुदायको हकहीत, स्थानिय निकायको निर्वाचन, नागरिकता, धर्म र न्यायपालीकामा जनताको रायसुझावका आधारमा प्रतिवेदन तयार पारेका हुन् ।
एमाओवादी उपाध्यक्ष श्रेष्ठले ती बुँदामा आजको बैठकमा सामान्य छलफल भएपनि असन्तुष्ट दलहरुको परामर्शपछिमात्र बुँदागत रुपमा छलफल थाल्ने बताउनुभयो ।
