काठमाण्डौ,७ असार ।
भावी संविधानको मस्यौदा निर्माणमा जुटेको कार्यदलले आज र भोली सहमतिको पहल गर्ने भएको छ । पछिल्लो पटक पाएको समय अवधिमा हिजोसम्म मस्यौदाले टुङ्गो नलागेपछि कार्यदलले पर्सी बुधबार मस्यौदा समितिमा एकिकृत प्रतिवेदन बुझाउने तयारी सहित काम अघि बढाएको हो ।
कार्यदल सदस्य एवम् कांग्रेस सभासद रमेश लेखकले भोलीसम्ममा मस्यौदामा देखिएको विवाद मिलाउने जानकारी दिनु भयो । संविधानसभाले संवाद समितिले टुंग्याउन बाँकी रहेका विवादित विषयमा समेत निर्णय गरी मस्यौदा निर्माणको जिम्मेवारी समितिलाई दिएको थियो ।
दलहरूबीच संविधानको प्रस्तावनामा प्रयोग गरिने बहुलवाद शब्दका अतिरिक्त नागरिकता, संक्रमणकालीन व्यवस्था, संवैधानिक निकायका पदाधिकारीको पुनर्नियुक्ति, संविधान संशोधन, महाभियोग तयारीका लागि विशेष संसदीय समिति लगायतका विषय विवादमा देखिएको हो ।
