काठमाडौ ७ असार । राष्ट्रिय विपद व्यवस्थापन अनुगमन तथा निर्देशन विशेष समितिले गोरखाको लाप्रकमा कुहिएकोे चामलका कारण महामारी फैलन सक्ने आशंका गरेको छ ।
विश्व खाद्य कार्यक्रम डब्लु एफपीले गोरखा लाप्राकका भूकम्प पीडितका लागि वितरण गरेको कुहिएको चामलको अवस्थाबारे अनुगमन गर्न लाप्रक पुगेका समितिले दुई दिनभित्र त्यहाँ महामारी फैलन सक्ने आशंका गरेको हो ।
त्रिपालभित्र भण्डारण गरेर राखिएको चामलमा झिंगा भन्किरहेको र निकै परसम्म दुर्गन्ध फैलिएको टोलीमा सहभागी सभासद उषा गुरुङले बताउनुभयो । भूकम्प पीडितलाई बाँड्नका लागि त्यहाँ र्पुयाइएको ४ सय ५७ बोरा चामलमध्ये १ सय २० बोरा चामल पूर्ण रुपमा कुहिएको पाइएको उहाँको भनाई छ ।
लाप्राकमा कुहिएको चामल बाँडिएको समाचार सार्वजनिक भएपछि विपद व्यवस्थापन समिति अन्तर्गत सभासद भानुभक्त ढकाल नेतृत्वको टोली लाप्राक पुगेको हो । ढकाल र गुरुङ सहित संसदीय टोलीमा सभासद दलबहादुर श्रीपाली पनि रहनुभएको छ ।
टोलीले आज गोरखाको मझुवा देउरालीस्थित विश्व खाद्य कार्यक्रमले चामल भण्डारण गरेको ठाउँको अध्ययन गरी सदरमुकाममा सर्वपक्षीय छलफल गर्ने सभासद गुरुङ जानकारी दिनु भयो ।
