काठमाडौँ, ३१ जेठ । डोल्पा समाजले भूकम्पमा परेर ज्यान गुमाएका, त्रासमा रहेका तथा घाइते भएका व्यक्ति र परिवारको शान्ति र कल्याणका लागि सञ्चालन गरेको विशेष पूजा कार्यक्रमको आज समापन गरिएको छ ।
बौद्ध स्तुप परिसरमा रहेको गुरु ल्हाखाङ गुम्बामा विगत सात हप्तादेखि उक्त धार्मिक कार्यक्रम सञ्चालन हुँदै आएको थियो ।
प्रत्येक दिन बिहान ८ देखि ४ बजेसम्म सामान्य र हप्ताको एक दिन विशेष पूजा चलाइएको समाजले जानकारी दिएको छ ।
वैशाख १९ गतेदेखि हरेक हप्ता १०५ जना लामाको सहभागितामा सञ्चालन हुँदै आएको विशेष धार्मिक कार्यक्रममा भूकम्पमा परेर ज्यान गुमाउनेको चिर शान्तिको कामनाका साथै उनीहरुको शीघ्र पूर्ण जीवन प्राप्तिका लागि पूजा गरिएको थियो ।
भूकम्प प्रभावित क्षेत्रमा विभिन्न रोग फैलन सक्ने सम्भावनालाई रोकथाम गर्न शुद्धता पूजाका साथै समग्र मुलुक र मुलुकवासीको कल्याण र सुख शान्तिका लागि लगातार शान्तिपूजा गरिएको संस्थाका अध्यक्ष निमा रिन्पोछेले जानकारी दिनुभयो ।
उहाँले भन्नुभयो – “भूकम्पले मुलुकमा ठूलो सङ्कट छोडेर गएको छ, यो दुःखलाग्दो कुरा हो, ज्यान गुमाएकाको चिर शान्ति र प्रभावितको कल्याणका लागि शान्ति समाजले शान्तिपूजाको आयोजना गरेको छ ।”
डोल्पामा स्थायी घर भएर काठमाडौँलगायत देशका विभिन्न जिल्लामा अध्ययनमा रहेका लामाहरुलाई जम्मा गरेर समाजले विशेष पूजा सञ्चालन गरेको थियो ।
जिल्लाको आर्थिक समृद्धि, सामाजिक उत्थान र सांस्कृतिक प्रवद्र्धन गर्न २०५४ सालमा गठन भएको डोल्पा समाजले जिल्लाको माथिल्लो भूभागमा बसोबास गर्ने गरिब जनताका छोराछोरीलाई शिक्षामा छात्रवृत्ति उपलब्ध गराउँदै आएको छ ।
उक्त समाजले प्रधानमन्त्री सुशील कोइरालामार्फत भूकम्पपीडितको राहतका लागि प्रधानमन्त्री दैवी प्रकोप उद्धार कोषमा रु सात लाख प्रदान गरिसकेको छ ।
