जेष्ठ ३१ चितवन ।
कृषि विकासका लागि सञ्चार माध्यमको भूमिकाका विषयमा केन्द्रीत रहेर चितवनमा दुई दिने अन्तरक्रिया आजबाट शुरु भएको छ ।
कृषि सञ्चार समाज नेपालको आयोजनामा शुरु भएको कार्यक्रमामा कार्यपत्र प्रस्तुत गर्दै प्रमुख अतिथि तथा कृषि सूचना तथा सञ्चार केन्द्रका निर्देशक ईश्वर प्रसाद रिजालले कृषि क्षेत्रमा गर्नु पर्ने काम, संभावना र आवस्यकताको विषयमा केन्द्रीत कार्यपत्र प्रस्तुत गर्नु भएको थियो ।
निर्देशक रिजालद्धारा प्रस्तुत कार्यपत्रमा कृषि क्षेत्रमा के कस्ता कार्यक्रमहरुले कृषकहरुलाई फाईदा पुग्दछ , कृषिजन्य वस्तुहरुको आयात प्रतिस्थापन गरी निर्यात प्रवद्र्धन गर्ने , भोकमरी अन्त्य गर्ने जस्ता कुराहरुमा जोड दिईएको छ ।
यसै गरी करार खेती ऐन, नीति र निर्देशिका तयारी पारी कार्यन्वयन गर्न पहल गर्नु पर्ने, जमीन बाझो राख्नेले सरकारलाई कर बुझाउनु पर्ने जस्ता कुराहरुका साथै कृषकहरुलाई तीन वर्गमा बिभाजन गर्नु पर्ने आवस्यकतामा जोड दिईएको छ ।
साथै कार्यपत्रमा कृषि तथा वन विश्व विद्यालय सञ्चालनका लागि पहल गर्ने उल्लेख छ ।
कार्यक्रममा चितवन जिल्ला कृषि विकास कार्यलयका बरिष्ठ अधिकृत सोमनाथ घिमिरे लगायतका उपस्थित हुनुहुन्थ्यो ।
कार्यक्रममा कृषि क्षेत्रको विकासमा एफएम रेडियोहरुको भूमिकाको विषयमा तुला अधिकारीले कार्यपत्र प्रस्तुत गर्नु भएको थियो ।
अन्तरक्रिया कार्यक्रम भोली समापन हुने समाजका अध्यक्ष धन बहादुर मगरले जानकारी दिनु भयो ।
