काठमाडौ, ३० जेठ ।
हिमाली जिल्ला मुस्ताङमा असोजदेखि फागुनसम्म पटक–पटक परेको हिमपातसँगै बढेको चिसाले चार हजार पशुचौपाया मरेका छन् ।
उपल्लो मुस्तङका लोमान्थाङ, छोसेर, छोन्हुप, घमी, चराङ र झोङ गरि ६ गाविसमा किसानले पालेका पशुचौपाया मरेपछि त्यस क्षेत्रका किसानले रु ४५ करोड बराबरको नोक्सानी बेहोर्नु परेको छ ।
जिल्ला पशु सेवा कार्यालय मुस्ताङका पशु चिकित्सक नन्दलाल बर्माले असोज अन्तिमसाता आएको हुडहुड आधी र त्यसपछि निरन्तर हिउँ परेपछि त्यस क्षेत्रमा पाँच फिटसम्म हिउँ जमेको बताउनुभयो ।
बर्माका अनुसार सबैभन्दा बढी च्याङ्ग्रा ३ हजार ७३९, लुलुगाई १ सय ५४, याक ४८, झोपा १६, भेडा ११ र १७ वटा घोडा मरेका छन् । छ गाविसमध्ये छोसेर गाविसमा सबैभन्दा बढी एक हजार २९९ च्याङग्रा मरेको तथ्याङ्कले देखाएको छ ।
पशु विभागसँगको सहकार्यमा छ गाविसमा पशुपालनका लागि व्यवस्थित गोठ र घास भण्डार कार्यक्रम सञ्चालनको तयारी भएको समेत पशु चिकित्सक बर्माले बताउनुभयो
