चितवन, ३२ जेठ : पदभार सम्हालेको एक महिनापछि भरतपुर अस्पताल अनुगमनमा आउनुभएका स्वास्थ्य तथा जनसङ्ख्यामन्त्री प्रदीप यादवलाई बिरामी र कुरुवाहरुले गुनासो राखेका छन् ।
अस्पतालका आकस्मिक कक्षमा उपचार गराइ रहनुभएका राप्ती नगरपालिका-९ का हिमाल राईले डायलासिसका बिरामीको समस्या मन्त्रीसमक्ष सुनाउनुभयो । उहाँले भन्नुभयो, “हामीलाई उपचारमा समस्या भयो । छुट्टै वार्डको व्यवस्था गरिदिनु प¥यो ।” उहाँले डायलासिस गर्ने बिरामीको वार्ड एउटै भएमा उपचारमा सहज हुने भएकोले उक्त व्यवस्था गरिदिन मन्त्री यादवलाई अनुरोध गर्नुभयो ।
ज्वरोका कारण बिहीबार अस्पतालको आकस्मिक कक्षमा भर्ना हुनुभएका भरतपुर महानगरपालिका-१४ का कृष्ण पराजुलीले भर्ना हुनका लागि शय्या पाउनै मुस्किल भएको गुनासो गर्नुभयो । उहाँले भन्नुभयो, “हिजो बेलुकीदेखि शय्या खोजेको अहिले बल्ल एउटा खाली भयो । यसरी कसरी उपचार गर्न सकिन्छ ?”
बिरामीका कुरा सुनिसकेपछि मन्त्री यादवले भन्नुभयो, “तपाईहरुको कुरा जायज हो, सेवा पाउनुपर्छ । यसका लागि म अस्पताल प्रशासनसँग कुरा गर्छु ।” औषधि किन्नका लागि अस्पतालको फार्मेसी अगाडि बसेका बिरामी र कुरुवाले बीमाबाट आवश्यक औषधि नपाउने गरेको गुनासो गरे । सस्तो औषधि फार्मेसीमा पाए पनि महँगो औषधि बाहिरबाट किन्नुपर्ने उहाँहरुको गुनासो थियो । गुनासो सुनिसकेपछि मन्त्री यादवले फार्मेसीका कर्मचारीले खाजा खान तालिका मिलाएर जान र औषधि पर्याप्त मात्रामा राख्न निर्देशन दिनुभयो ।
