असोज ११ काठमाण्डौं । देशमा उत्पादन र औद्योगिकीकरण हुन नसक्नुको परिणाम स्वरुप जनता उपभोग्य बस्तुमा पनि विदेशमै निर्भर रहनु परीरहेको छ । यति सम्म कि स्वदेशमै भएका उत्पादनहरु यही लापरवाहीका कारण खेर गईरहेको छ ।
नेपालको स्याउ पनि यही मारमा परेको छ । नेपालमा हरेक बर्ष साढे ४ अर्ब भन्दा बढीको स्याउ, भारत, चीन, अमेरीका लगायतका मुलुकबाट आँउछ । तर डोल्पा, मुगु, हुम्ला, जुम्ला, कालिकोट, रुकुम, मनाङ र मुस्ताङ लगायतका जिल्लामा फलेका स्याउ उपयुक्त स्टोर, ढुवानी र बजारीकरण हुन नसक्दा धेरै जसो खेर जाने स्थिति छ ।
नेपालमा बर्ष भरीमा ८४ हजार मेटिक टन स्याउ खपत हुन्छ । नेपालमा उपयुक्त हावापानी र अग्र्यानिक तरीकाले फलेका स्वाउ स्वादीलो र गुणस्तरीय भए पनि खपत हुन सकेको छैन । भन्सार विभागका अनुसार एक आर्थिक बर्षमै नेपालमा साढे ४ अर्ब बढीको विदेशी स्याउ आयात भएको छ ।
एकातिर सरकारले बजार व्यवस्थापनमा ध्यान दिएको छैन भने अर्कोतिर उपभोक्ता पनि उपलव्ध स्याउमा गुणस्तर र स्वदेशी उत्पादन भन्दा पनि आकर्षक स्वरुपमा रहेका स्याउतिर ध्यान दिन्छन् । यी सबै कारणले किशानले मेहेनत गरेर उत्पादन गरेको स्वदेशी स्याउले बजार र आमदानी पाउन मुस्किल पर्ने गरेको छ ।
