फाल्गुन २७, विराटनगर । सुनसरीको बर्जुस्थित इस्टर्न सुगर मिलले किसानलाई यसपालिको उखुको २५ करोड रुपैयाँ भुक्तानी गरेको छ । मिलले सोमबारसम्म करिब १२ लाख क्विन्टल उखु क्रसिङ गरेको छ ।
‘यस वर्षको क्रसिङ सकिन लागेको छ,’मिलका नायब महाप्रबन्धक कृष्ण गौतमले भने,‘यसपालि क्रसिङ सकेको दुई साताभित्र किसानको सबै रकम भुक्तानी गर्ने तयारी छ।’
मिलले प्रतिक्विन्टल ४ सय ७१ रुपैयाँ २८ पैसाका दरले भुक्तानी दिएको हो। दुई साताअघि क्रसिङ गरिएको उखुको भुक्तानी सबै गरिएको र बाँकी उखुको पनि क्रसिङ गरेको दुई सातापछि सबै रकम भुक्तानी गरिने गौतमले जानकारी दिए। यसबाहेक सरकारले किसानलाई प्रतिक्विन्टल ६५ रुपैयाँ अनुदान दिनेछ।
मिलले गत वर्ष १२ लाख ८७ हजार क्विन्टल उखु क्रसिङ गरेर किसानलाई असारमा एकमुष्ट ५२ करोड ३९ लाख ५६ हजार रुपैयाँ भुक्तानी दिएको थियो। सरकारले गत वर्षको अनुदान रकम भर्खरै दिएको कोसी उखु उत्पादक संघका अध्यक्ष शिवलाल चौधरीले बताए।
सरकारले गत वर्ष यो मिलका किसानलाई ७ करोड ४८ लाख ३९ हजार रुपैयाँ अनुदान दिनुपर्नेमा २ करोड ३३ लाख ८४ हजार बाँकी राखेको थियो। उक्त रकम एक साताअघि सरकारले निकासा गरेको छ।
कान्तिपुरबाट
