७ माघ, सर्लाही ।
सरकारले चिनी उद्योगलाई उखु किसानको बक्यौता भुक्तानी गर्न दिएको समयसीमा आज सकिँदैछ । तर उद्योगीले सबै रकम तोकिएकै मितिमा उपलब्ध गराउन नसक्ने बताएपछि किसानहरुले पूरै भुक्तानी नपाउने भएका छन् ।
चिनी उद्योगीहरुले किसानहरुलाई क्रमिक रुपमा रकम दिइरहेको भन्दै सबै रकम तोकिएकै मितिमा उपलब्ध गराउन नसक्ने सरकारलाई जानकारी गराएका छन् ।
पुसको पहिलो सातादेखि बक्यौता रकम पाउनु पर्ने माग गर्दै काठमाडौंमा चरणबद्ध आन्दोलन थालेका उखु किसानहरुसँग पुष १८ गते सरकारले माघ ७ गतेभित्र उखु बिक्रीवापतको बाँकी बक्यौता रकम चिनी उद्योगबाट उपलब्ध गराउने गरी पाँच बुँदे सहमति गरेको थियो ।
तर मन्त्रालयले हिजोसम्म महालक्ष्मी सुगर मिलले ११ करोड ५० लाख, अन्नपूर्णले ३ करोड ९० लाख र इन्दिरा सुगर मिलले ७४ लाख रुपैयाँ भुक्तानी गरेको मन्त्रालयका प्रवक्ता दिनेश भट्टराईले जानकारी दिनुभयो ।
अब इन्दिरा र अन्नपूर्ण सुगर मिलले २१ करोड ३८ लाख तथा महालक्ष्मी सुगर मिलले १० करोड ९० लाख रुपैयाँ भुक्तानी दिन बाँकी रहेको मन्त्रालयले जनाएको छ ।
उखु उत्पादक महासंघ नेपालका अध्यक्ष कपिलमुनि मैनालीले किसानको आन्दोलनपछि केही उद्योगीहरुले तालिका बनाएर बक्यौता रकम तिरिरहेको बताउनु भयो ।
अन्नपूर्ण र इन्दिरा मिलले २१ करोडभन्दा बढी र श्रीराम मिलले २६ करोड वक्यौता तिर्न बांकी छ ।
