कृषि तथा पशुपन्छीमन्त्री घनश्याम भुसालले परम्परागत कृषि प्रणालीलाई ‘एग्रो फरेस्टी’सँग जोड्न आवश्यक भएको बताउनुभएको छ ।
आज तिलोत्तमामा नेकपाले आयोजना गरेको अगुवा कार्यकर्ता भेलामा उहाँले सहकारीसँग भएको पूँजीलाई कृषिमा परिचालन गरेर लाभ लिन सकिने तर्क गर्नुभयो ।
मन्त्री भुसालले भन्नुभयो, “मुलुकमा हाबी भएको दलाल पूँजीवादका कारण कृषि क्षेत्रमाथि उठ्न सकेको छैन ।” उहाँले विकासमा स्थानीय सरकार र प्रदेश सरकारले भूमिका निर्वाह गर्न सक्ने उल्लेख गर्दै कृषि प्रणालीमा हुने परिवर्तनबाट जनताले राहत महसुस गर्न सक्छन भन्नुभयो ।
मन्त्री भुसालले कृषिलाई उद्योगका रुपमा विकास गर्न जोड दिँदै कृषि क्षेत्र चुनौतीपूर्ण रहेको बताउनुभयो । नेकपा तिलोत्तमा नगर कमिटीका अध्यक्ष मोहन चापागार्इंको अध्यक्षतामा भएको सो कार्यक्रममा प्रदेशसभा सदस्य दधिराम न्यौपानेलगायतले कृषिमा हुने रुपान्तरणबाट कृषकले लाभ लिने बताउनुभयो ।
