काठमाडौं, ७ असोज ।
श्रममन्त्री गोकर्ण बिष्टले अब सरकारी कर्मचारी र म्यानपावर व्यवसायीको भेट नै नहुने बताउनु भएको छ । केही दिनभित्रै सुरु गर्न लागिएको अनलाइन प्रणालीलाई ईंगित गर्दै उहाँले यस्तो दावी गर्नु भएको हो ।
वैदेशिक रोजगार व्यवसायी संघको २७ औं साधारणसभाको उद्घाटन समारोहमा बोल्दै मन्त्री बिष्टले व्यवसायीलाई फाइल बोकेर वैदेशिक रोजगार कार्यालयमा पुग्नुपर्ने बाध्यता हटाइने विश्वास दिलाउनुभयो ।
उहाँले विदेश जाने युवाप्रति व्यवसायीको पनि दायित्व हुने भन्दै त्यसबाट पछि हट्न नपाइने बताउनुभयो । वैदेशिक रोजगारीमा रहेको समस्या हटाउन सरकारले चालेका कदममा व्यवसायीले साथ दिनुपर्ने उहाँको भनाइ थियो ।
उहाँले अनियमित काम गर्ने कर्मचारीबारे गुनासो आएको ५ मिनेटमा त्यहँबाट हटाएको उदाहरण पनि प्रस्तुत गर्नुभयो । अब म्यानपावरहरुले पनि आफ्नो कार्यशैली बदल्नुपर्ने मन्त्री बिष्टको भनाइ थियो ।
गलत क्रियाकलापहरु नगर्न आग्रह गर्दै उहाँले शैली बदलेर अघि बढ्दा कामदारको मात्रै नभएर व्यवसायीको पनि हित हुने बताउनुभयो ।
