एक युरोपेली मुलुकमा किशोरी तथा युवतीहरुलाई आफ्ना भित्री वस्त्रमा चम्चा लुकाउन भनिएको छ ।
जबरजस्ती बिहे तथा योनीच्छेदनका लागि गुपचुप अन्य देशहरुमा लैजानेक्रम बढेपछि युरोपेली मुलुक स्विडेनको एक सहरका किशोरी तथा युवतीहरुलाई आफ्ना भित्री वस्त्रमा चम्चा लुकाएर राख्न सुझाव दिइएको छ ।
स्विडेनको गुटेनबर्ग सहरमा छोरीहरुलाई उनीहरुका अभिभावकहरुले जबरजस्ती बिहे तथा योनीच्छेदनका लागि गुपचुप अन्य देशहरुमा लग्ने गरेका छन् । सोहि कारण यस्तो अनौठो तथा रोचक सुझाव दिइएको हो ।
ता की किशोरी तथा युवतीहरुलाई आफ्नो भित्री वस्त्रभित्र लुकाएको चम्चाका कारण बचाउन सकियोस् । भित्रि बस्त्रमा धातुको चम्चा लुकाउन भनिएको छ ।
एयरपोर्टमा चेकिंगका बेला उनीहरुलाई मेटल डिटेक्टरले पक्रिने र पछि सुरक्षा अधिकारीहरुले थप चेकजाँचका लागि गोप्य कोठामा लैजादा ती युवती तथा किशोरीहरुले अधिकारीहरुसँग आफुलाई जबरजस्ती देश बाहिर लैजान लागिएको खुलासा गर्न सक्नेछन् ।
यो पूरै कारवाहीका लागि गुटेनबर्ग एयरपोर्टका अधिकारीहरुलाई पनि विशेष निर्देशन दिइएको छ ।
गुटेनबर्ग सहरका किशोरी तथा युवतीहरुलाई जबरजस्ती देशबाहिर लैजानबाट जोगिने यो अन्तिम विकल्प भएको भन्दै महिला हिंसाको विरुद्धमा काम गर्ने एक अधिकारकर्मीले एयरपोर्टका अधिकारीहरुसँग विशेष कुराकानी गरेका छन् ।
स्विडेनमा गुटेनबर्ग लगायतका अन्य सहरमा पनि महिलामाथि यस्ता खाले हिंसाका घटना देखिने गरेका छन् । यस्ता सबै सहरका किशोरी तथा युवतीहरुलाई भित्री वस्त्रमा चम्चा राख्न सुझाव दिइनुका साथै एयरपोर्टहरुलाई यस विषयमा सतर्कता अपनाउन निर्देशन दिइनेछ ।
यसअघि बेलायतमा पनि यस्तै तरिकाको अबलम्बन गरिएको थियो ।
-एजेन्सीको सहयोगमा
