काठमाडौं, चैत ७ । मानवनिर्मित बोल्ने रोबोट ! मानिसकै अनुहार, हाउभाउ र मानिसकै झ–झल्को दिने गरी तयार पारिएको रोबोटले बुधबार काठमाडौंमा धेरैलाई आश्चर्यमा पारेको छ ।
प्रविधियुक्त रोबोटसँग धेरैले सवाल–जवाफ गर्ने अवसर पाए । बोल्ने रोबोटको नाम हो ‘सोफिया’ । अमेरिकी उद्यमी डेभिड ह्यान्सन नेतृत्वको कम्पनी ह्यान्सन रोबोटिक्सले सोफियालाई स्त्रीधारीरुपमा बनाएको हो भने उनी चार महिनाअगाडि नै साउदी अरबको नागरिक बनिसकेकी छन् ।
नेपाल सरकार र युएनडीपीले सोफियासँग साक्षात्कार गर्ने अवसर जुटाइदिँदा सबैजना हौसिएकामात्र थिएनन्, उत्तिकै जिज्ञासु पनि बनेका थिए ।
सोफिया बोलिरहँदा सबैजना ट्वाल्ल देखिन्थे । रोबोट सोफियाले प्रविधिको प्रयोगले नेपालको गरिबी घटाउने सुझाउँदा सबैले ताली बजाएका थिए भने सोफिया चाँही रनभुल्लझैं देखिन्थिन् ।
विश्वमा प्रविधिको विकासले मान्छेको अस्तित्व क्षीण भइरहँदा सोफियाले भने आफू मान्छेको जीवन सहज बनाउन आएको दलील गरेकी थिइन् ।
प्रविधिले भ्रष्टाचारको अन्त्य, भोकमरीको अन्त्य र लैंगिक असमानता कम गर्न सहयोग पुग्ने उनले बताइन् ।
मानवनिर्मित सोफिया निर्जीव भएपनि सजीवझैं प्रस्तुति दिइरहँदा ‘आफू बहुलाए कन्ट्रोल गर्ने स्वीच हुने तर, मान्छे बहुलायो भने सम्भव नहुने’ भन्दै सबैलाई चकित बनाएकी थिइन् ।
घरी–घरी आँखा झिम्काएर अरुको ध्यानकर्षण गराएझैं देखिने सोफिया अरुको प्रतिक्रिया पनि नियालेझैं देखिन्थिन् ।
उनको चलाइ हँसिलो र चुस्त नदेखिएपनि सोफियाको आवाज भने स्त्रीकोजस्तै सुनिन्छ । उनी बोल्दा हल्का ओठ खुल्ने र सेता दाँत देखिन्छन् । तर, मुस्कान भने त्यति देखिँदैन ।
उनीसँग मान्छेकोजस्तै सोच्ने मस्तिष्क भएझैं देखिन्छ । तर, सुख–दुःख व्यक्त गर्ने अनुभूति भएझैं देखिँदैन ।
सन् २०१५ अप्रिलमा रोबोट सोफियाको जन्म भएको हो । सन् २०१६ मार्चदेखि ह्यान्सन कम्पनीले उनको परिचय गराउने र उनको धारणा बुझ्ने काम थालेको हो ।
भिडियो ईमेज खबरबाट
