एजेन्सी ।
बेल्जियममा बलात्कार पीडित महिलाले घटना भएको अवस्थामा लगाएको कपडाको प्रदर्शनीको आयोजना गरिएको छ ।
महिलाहरुमाथि हुने बलात्कार तथा अन्य खाले यौनहिंसामा उनीहरुले लगाउने भड्किला पहिरनको पनि भूमिका रहने गरेको कतिपयको भनाई रहने गरेको अवस्थामा यस्तो मान्यतालाई तोड्नका लागि बेल्जियममा बलात्कार पीडित महिलाको कपडाको प्रदर्शनी गरिएको हो ।
ब्रसेल्सको मोलेनबिक जिल्लामा आयोजित उक्त प्रदर्शनीको ‘इज इट माई फल्ट ?’ अर्थात् ‘के यो मेरो गल्ती हो ?’ भन्ने नाम दिइएको छ ।
ट्रयाकसूट, पाइजामा, पाइन्ट लगायतका कपडाहरु प्रदर्शनीमा छन् । बलात्कार पीडित महिलाहरुले नै दिएका कपडाहरु प्रदर्शन गरिएको आयोजकको भनाई छ ।
पीडित सहायता समूह सि ए डब्ल्यू इस्ट ब्रबेन्टको आयोजनामा प्रदर्शनी भएको हो । बलात्कार पीडिताले लगाएका पहिरनहरु निकै सामान्य हुने गरेको भन्दै आयोजक लिसवेथ केन्सले भनिन् , जो सबै आम महिलाले लगाउँछन् ।
प्रायः यौन हिंसाका घटनामा पीडित महिलालाई नै दोष लगाउने गरिएको भन्दै उनले आफुमाथिको यौन उत्पीडनका लागि उनी आफै जिम्मेवार छन् भन्ने गरिएको बताईन् ।
पीडित महिलाहरुमाथि उत्तेजक कपडा लगाएको, रात अबेरसम्म घरबाहिरै रहने गरेको, केटाहरुसँग जिस्किने गरेको जस्ता आरोप लगाउने गरेको केन्सको भनाई छ । बीबीसीबाट
