काठमाडौ ८ असार ।
विभिन्न चार बुँदे माग राख्दै राजधानीको भद्रकालीमा सात दिनदेखि अनशनमा बसेका अस्थायी शिक्षकको स्वास्थ्य अवस्था गम्भिर बन्दै गएको छ ।अस्थायी शिक्षक केन्द्रिय आन्दोलन परिचालन समितिको नेतृत्वमा गत आसार २ गतेबाट ५ जना शिक्षक अनशनमा बसेका छन् ।
पर्साका किशुन प्रसाद यादव र सुरेखा कायस्थ, बझाङका कलावती जोशी, बाजुराका करु केसी र गोरखाका जीतबहादुर गुरुङ समितिको प्रतिनिधित्व गर्दै अनशनमा बसेका छन् ।
आफूहरुसँग विगतमा भएका सम्झौता कार्यन्वयन नभएको भन्दै सात दिनदेखि अनशनरत शिक्षकको स्वास्थ्य प्रतिकुल बन्दै गएपछि हिजो वीर अस्पतालका चिकित्सकले स्लाइन पानी दिएका थिए ।
सरकारसँग पटक पटक विभिन्न सम्झौतामा हस्ताक्षर भएपनि कार्यन्वयन हुन नसकेकाले आफूहरु बाध्य भएर आन्दोलनमा उत्रनु परेको अस्थायी शिक्षकको भनाई छ ।
उनीहरुले विभेदकारी शिक्षक विज्ञापन खारेज गर्नुपर्ने, विस्थापित शिक्षकलाई साबिक पदमै स्थापित गर्नुपर्ने, सेवा अवधि गणना हुनुपर्ने र सम्पूर्ण अस्थायी शिक्षकलाई प्रक्रिया पुर्याएर स्थायी गर्नुपर्ने माग राखेका छन् ।
