एजेन्सी, बैशाख १० ।
एक नवजात शिशुलाई आफूले जन्म दिई पुरेको तीन दिनपछि जमिनमुनिबाट जीवितै उद्दार गरिएको छ ।
दक्षिण अफ्रिकाको क्वाजुल नेटल प्रान्तमा रहेको पडक शहरकी एक २४ वर्षीया महिलाले आफ्नो आमाबाबुको डरले उक्त बच्चालाई जन्म दिई आफूले काम गर्ने काठ कारखानाकै जमिनमा माटो र काठका टुक्राहरूले आफ्नो शिशुलाई पुरेकी थिइन् ।
गत बिहीबार तीन दिनपछि त्यहीँ काम गर्नेहरूले बच्चा रोएको आवाज सुनेपछि प्रहरीलाई खबर गरेका थिए । प्रहरीले उक्त क्षेत्रमा अनुसन्धान तथा खोजतलास गर्दा जीवितै नवजात शिशुलाई माटोमुनिबाट निकालेको ‘डेलिमेल’ले जनाएको छ ।
ती महिलालाई प्रहरीले पक्राउ पनि गरिसकेको छ । महिलाले पनि उक्त नवजात शिशु आफ्नो रहेको स्वीकार गरेकी छन् । न्यून आयस्तर भएकी ती महिलाले यसअघि नै एक सन्तान भएको र फेरी यो बच्चा पनि हुँदा आमाबाबुको डरले उक्त नवजात शिशुलाई गाडेको प्रहरीसमक्ष बयान दिएकी थिइन् ।
शिशुलाई अहिले सेपस्टोन क्षेत्रीय अस्पतालमा इन्टेसिभ केयर युनिट (आईसीयू)मा राखेर उपचार भइरहेको प्रहरीले जनाएको छ ।
प्रहरी प्रमुख (कप्तान) गेराल्ड फेकाले दिएको जानकारीअनुसार ती महिलाले पुनः त्यस्तै हर्कत गर्न सक्ने भन्दै अस्पतालले बच्चालाई प्रहरीको जिम्मा लगाउन चाहेको बताए ।
