पाल्पा, १६ फागुन ।सिलुवा गाविस–४ मनहरी, पाल्पा बस्ने दुवै मिर्गौलापीडित २६ वर्षीेया खुमीसरा रानालाई दुवै मिर्गाैलाले काम नगरेपछि उपचारमा समस्या परेको छ ।

आठ महिनाको बालक काखमा च्यापेर रानाले उपचारमा सहयोग गर्न सबैसँग सहयोगको याचना गर्नुभएको छ ।

मिर्गौला प्रत्यारोपण गर्नका लागि ठूलो रकम लाग्ने अस्पतालले बताएपछि उहाँलाई उपचारमा समस्या परेको हो । मिर्गौलापीडित राना र उहाँका श्रीमान् रामपुर नगरपालिका–७ मा सञ्चालित कालिका चाउचाउ उद्योगमा मजदुरी गर्दै आउनुभएको छ ।

डेढ महिनादेखि मिर्गौला रोगको उपचार गराइरहनुभएकी रानालाई अस्पतालले रु १० लाख जति रकम लाग्ने बताएपछि उहाँको परिवार चिन्तामा रहेको छ । बुटवलको गौतम बुद्ध र काठमाडौँको किस्ट अस्पतालमा उपचार गर्दा अहिलेसम्म रु दुई लाख रकम खर्च भइसकेको उहाँका भाइ छवि राईले बताउनुभयो ।