जुम्ला, १६ पुस । कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा आठ महिनादेखि पदाधिकारी विहीन रहेको छ ।
गत जेठमा प्रतिष्ठानका उप–कुलपति डा. पारसकुमार आचार्यको पदावधि सकिएपछि हालसम्म नयाँ उप–कुलपति नियुत्त हुन सकेको छैन ।
उप– कुलपति, रजिष्ट्रार र अस्पताल निर्देशकलगायतका पदाधिकारी विहीन हुँदा प्रतिष्ठानको दैनिक तथा प्रशासनिक कार्य अस्तव्यस्त रहेको छ ।
अस्पताल निर्देशक डाक्टर जावेद अहमेद खानले प्रतिष्ठान छोडेको पनि सात महिना भन्दा बढी भइसकेको र रजिष्ट्रार श्याम लम्सालको पनि गत साउनमा नै कार्यकाल सकिएपछि तीनै पद रिक्त रहेको छ ।
पदाधिकारी रिक्तताले प्रशासनिक काममा झनै ठूलो समस्या आएको निमित्त उप–कुलपति डा धर्मराज श्रेष्ठले बताउनु भयो ।
सामान्यत तल्लोस्तरका काम भए पनि आर्थिक सम्बन्धी ठूला काममा समस्या आउने गरेको भन्दै पदाधिकारीका विषयमा बारम्बार कुरा उठाउँदा पनि त्यसको सुनुवाई नै नभएको गुनासो गर्नुभयो ।
राजनीतिक भागबण्डाका कारण पदाधिकारी नियुत्त हुन नसकेको उहाले बताउनु भयो । प्रतिष्ठान नेतृत्व विहीन हुनुले प्रशासनिकसहित शैक्षिक, प्राज्ञिक र व्यवस्थापकीय क्षेत्रमा समस्या आएको प्रशासकीय अधिकृत द्वन्द्वबहादुर शाहीले जानकारी दिनुभयो ।
