काठमाण्डौं ,१७ मंसिर । स्वास्थ्य मन्त्रालयले नेपालमै कलेजो प्रत्यारोपण गर्ने गरी मानव अंग प्रत्यारोपण नियमावली २०७३ ले ल्याएको छ ।
सो नियमावलीले कलेजो प्रत्यारोपणसँगै ब्रेन डेथबाट भएकाहरुको शरिरका आठ वटा अंग लिने र ति अंग प्रत्यारोपण गर्नेबाटो समेत खुल्ला गरेको छ ।
स्वास्थ्य मन्त्री गगनकुमार थापाले मन्त्री भएकै दिन ६ महिना भित्र नेपालमा कलेजो प्रत्यारोपण सुरु गर्ने घोषणा गरेका थिए । उनको घोषणा अनुरुप तीन महिना भित्रै कलेजो प्रत्यारोपण सेवाको सम्पूर्ण तयारी पुरा भएको हो ।
नेपालमा कलेजो प्रत्यारोपणका लागि केही जनशक्ति भएपनि भौतिकपूर्वाधार र आधुनिक उपकरणका कारण सम्भव भएको थिएन । कलेजो प्रत्यारोपणका लागि भारत लगायतका मुलुकमा एक करोड रुपैयासम्म खर्च लाग्ने भएपनि नेपालमा १५ देखि २० लाख रुपैयामा प्रत्यारोपण हुनेछ । नेपालमा प्रत्यारोपणको सुरुवात मानव अंग प्रत्यारोपण केन्द्रले गर्ने केन्द्रका निर्देशक डा पुकारचन्द्र श्रेष्ठले बताए ।
केन्द्रले कलेजो प्रत्यारोपण सम्बन्धी ख्याति प्राप्त डाक्टर सहितको विदेशी टोली बोलाएर केही हप्तापछि नेपालमा कलेजो प्रत्यारोपण सेवा सुरु गर्ने तयारी गरेको छ ।
