काठमाडौं, कात्तिक ८। तराईका विभिन्न जिल्लामा देखिएको लामखुट्टेको टोकाइबाट सर्ने डेंगु रोग नियन्त्रणका लागि स्वास्थ्य मन्त्रालयले विशेषज्ञ टोली परिचालन गरेको छ । मन्त्रालयले डेंगुबाट बढी प्रभावित चितवन र झापामा विशेष अभियान ‘सर्च एन्ड डिस्ट्रोए’ अभियान चलाएको हो ।
सो अभियानलाई हिजोदेखि दमकमा पनि विस्तार गरिएको छ । डेंगुको सङ्क्रमण भएका र हुनसक्ने तराईका जिल्लामा विशेष सतर्कताका साथ नियन्त्रणको अभियान चलाइएको इपिडिमियोलोजी तथा रोग नियन्त्रण महाशाखाका निर्देशक डा. भीम आचार्यले जानकारी दिनुभयो ।
अहिलेसम्म डेंगुका ३४ बिरामी देखिएको झापामा डा. यदुचन्द्र घिमिरे र ल्याब टेक्निसियन डबलबहादुर विसीको टोली आज बिहान सो स्थानमा पुगी अभियान सुरु गर्ने महाशाखाका निर्देशक डा. आचार्यले बताउनुभयो ।
उहाँका अनुसार दमकमा डेंगु परीक्षणका लागि मन्त्रालयबाट खटाइएको टोलीका साथ आवश्यक कीटसमेत उपलब्ध गराइएको छ । डेंगु नियन्त्रणका लागि लामखुट्टे नियन्त्रण नै एकमात्र उपाय भएकाले त्यसको लागि आवश्यक सतर्कता अपनाउन मन्त्रालयले सबैमा आह्वान समेत गरेको छ ।
