काठमाडौं ,२ भदौ । सरकारले मधेस आन्दोलनका क्रममा मृत्यु भएकाको परिवारलाई १० लाख दिने निर्णय गरेको छ ।
आज बसेको मन्त्रिपरीषद बैठकले आन्दोलनका क्रममा मारिएका मधेस आन्दोलनमा मारिएका ११ सुरक्षाकर्मी सहित ५२ जनाका परिवारलाई १०–१० लाख रूपैयाँ क्षतिपूर्ति दिने निर्णय गरेको छ ।
साथै आन्दोलनका क्रममा भएका घटना छानविन गर्न पूर्वन्यायाधीश गिरिशचन्द्र लालको अध्यक्षतामा आयोग गठन समेत गरेको छ ।
आज बसेको बैठकले मधेश आन्दोलनका क्रममा ज्यान गुमाएका प्रदर्शनकारी, सुरक्षाकर्मी तथा सर्वसाधारणलाई शहिद घोषणा गर्दै जनही १० लाख रुपैयाँ दिने निर्णय गरेको हो ।
शहिद घोषणा गरिएकामध्ये ११ जना सुरक्षाकर्मी छन् । यसअघि आन्दोलनकारी दलले शहिद घोषणाका लागि भन्दै ६८ जनाको सूची प्रधानमन्त्री पुष्पकमल दाहाललाई बुझाएका थिए । ति मध्ये छानविन गरी ५२ जनालाई मात्र शहिद घोषणा गरिएको हो । यस्तै आन्दोलनका क्रममा भएका घटनाको छानविन गर्न सरकारले पूर्व न्यायाधीश गिरिसचन्द्र लालको अध्यक्षतामा सात सदस्यीय आयोग गठन गरेको छ ।
आयोगमा रहने सदस्यको नामावली भने प्रधानमन्त्रीको समन्वयमा गृह मन्त्रालयले तय गर्ने बताइएको छ । मन्त्रिपरिषद बैठकले अफगानिस्तानको काबुल घटनाका घाईतेको उपचारका क्रममा लागेको ९१ लाख ६ हजार रुपैयाँ सरकारले बेहोर्ने निर्णय गरेको छ ।
बैठकले स्थानीय निकायको निर्वाचन सम्बन्धि विधेयकमा सैद्धान्तिक सहमति जनाएको छ । यस्तै योजना आयोगका सहसचिव गोपीनाथ मैनालीलाई सचिवमा बढुवा गरिएको छ भने प्रधानमन्त्रीको जनसम्पर्क सल्लाहकारमा माओवादी केन्द्रका पोलिटव्यरो सदस्य रामदिप आचार्यलाई नियुक्त गरिएको छ ।
