तिम्रो विदाईमा !


तिम्रो विदाईमा
तिमी थिएनौ
तिम्रो मूर्दा शरीर मात्र थियो
तिम्रो मृत्युपछि
तिनै मानिसहरू आए
तिमी जोसँग दिक्दार थियौ !

तिम्री जीवन सँगिनी
तिम्रा जीवनका सिर्जना पुष्पहरू
तिम्रो सिर्जनाका जोर मुहान
ती हतप्रभ थिए , विक्षिप्त थिए !

तर ती अरु मानिसहरू
तिम्रो लास अघि पनि
सत्ताकै गुणा भागामा थिए
तिम्रो रिक्त स्थानको लागि
कुनै आफन्तको अनुहार सोच्दै थिए !

तिम्रो मरण,
कसैको लागि थियो-
एक इमान्दार जीवन साथीको मृत्यु
कसैको लागि थियो-
एक असल अभिभावकको विदाई
कसैको लागि थियो-
एक योग्य सन्तानको मरण
र कसैको लागि थियो-
एक असल सहयात्रीको वियोग !

तर
तिम्रो लास वरिपरि
जो जो उभिएका थिए साखुल्ले पल्टेर
तिनीहरूको आँखाबाट खसेको
मान्छेको आँसु थिएन
तिनीहरू आएका थिए-
तिम्रो लासमाथि पनि राजनीति गर्न
र अर्को पटकलाई भोट थप्न !

तिमी जति सजिलै गयौ
त्यति नै सजिलै भुल्ने छन् तिनीहरू
भुल्दै नभुल्ने त तिनीहरूले हो-
जसको जीवनको पलपलको लागि
तिमी यथार्थमै गुम्यौ !

प्रिय साथी !
हिजो आज मृत्यु
बर्गीय हुन छोडेको छ
मृत्युको समवेदना
नितान्त पारिवारिक बन्दै छ !

तिम्रो मृत्युपछि पनि
ठीक त्यही भयो
भरे साँझ
उदास उदास आँगन
केवल तिम्रो मात्र हुने छ साथी !

२०७६|०२|३०
सुवर्ण चोक

शुक्र, असार २, २०७६ मा प्रकाशित

यसमा तपाइको प्रतिक्रिया