नेपालकाे पहिलो स्याटेलाइटकाे सफल परिक्षणः प्रधानमन्त्रीले दिए बधाई


काठमाडौं, ५ वैशाख । नेपालले आफ्नो पहिलो भूउपग्रह (स्याटेलाइट )‘नेपाली स्याट १’ बिहीबार बिहान अन्तरिक्षमा सफल प्रक्षेपण गरेको छ ।

नेपाली झन्डा, विज्ञान तथा प्रविधि प्रतिष्ठान (नास्ट) को लोगोसहित नेपाली समयअनुसार बिहान साढे २ बजेर ३१ मिनेटमा अमेरिकाको भर्जिनियास्थित स्पेस कम्पनीको रकेटबाट स्याटेलाइट पठाइएको हो । ‘नेपालीस्याट–१’ सँगै श्रीलंकाको रावन–१ र जापानको युगुसु भूउपग्रह प्रक्षेपण गरिएको नासाले जनाएको छ ।

नेपाली भूउपग्रह प्रक्षेपण भएसँगै प्रधानमन्त्री केपी शर्मा ओलीले सबैलाई बधाइ दिएका छन् । उनले ट्वीट गर्दै भनेका छन्, ‘आज बिहान २ः३१ बजे नेपालको पहिलो भूउपग्रह नेपाली स्याट–१ प्रक्षेपण भएको छ, योसँगै नेपाल पनि सेटलाइट प्रक्षेपण गर्ने मुलुकहरुको सूचिमा जोडिएको छ । यसको निर्माणदेखि प्रक्षेपणसम्म, मुलुकको श्रीबृद्धिमा संलग्न सबै वैज्ञानिक तथा नास्टसहितका सबै निकायहरुलाई हार्दिक बधाई ज्ञापन गर्दछु ।’

करिब डेढ करोडको लागतमा बनेको यो स्याटेलाइट ‘नानो’ वर्गमा पर्छ । यो स्याटेलाइटको तौल १ किलो ३ सय ग्राम छ । घनाकार स्याटेलाइटको  लम्बाइ, चौडाइ र उचाइ १०–१० सेन्टिमिटर छ  ।

जापानको क्युसु इन्स्टिच्यूट अफ टेक्नोलोजी (क्युटेक) मा नेपालका २ र अन्य देशका ८ वैज्ञानिकले तयार पारेकाे यसको आयु अधिकतम ३ वर्ष हुने र यसले खिचेका तस्बिरहरू सामान्य खालका हुने नास्टको प्रविधि विभाग प्रमुख डा. रवीन्द्र ढकाल बताउँछन् ।

प्राविधिक रुपमा उच्च क्षमताको नभए पनि आफ्नै स्याटेलाइट अन्तरिक्षमा पुर्‍याउने पहिलो कदम नेपालको विज्ञान क्षेत्रमा महत्वपूर्ण उपलब्धि भएको ढकाल बताउँछन् ।

स्याटेलाइटले अन्तरिक्षमा पुगेको झन्डै एक महिनासम्म इन्टरनेसनल स्पेस स्टेसनमा गएर बस्ने र मे महिनाको अन्त्यबाट पृथ्वीको चक्कर काट्न थाल्ने छ । त्यसको तीन दिनपछि स्याटेलाइटले तथ्यांक पठाउन सुरु गर्ने अनुमान गरिएको छ ।

यो स्याटेलाइटले पृथ्वीसँग निश्चित दुरीमा रहेर ९० मिनेटमा पृथ्वीको एक चक्कर लगाउने छ ।

यस क्रममा नेपालको आकाशमाथि दैनिक ४ देखि ५ मिनेट रहने छ ।

बिहि, बैशाख ५, २०७६ मा प्रकाशित

यसमा तपाइको प्रतिक्रिया