भोजपुरमा अनिश्चितकालिन यातायात बन्दको आह्वान

भोजपुर, पुस ११ ।
आज देखि भोजपुरमा यात्रुबाहक बसका सञ्चालकलाई कुटपिट गरेको आरोपमा अनिश्चितकालीन यातायात बन्द गरिएको छ ।

गत शनिबार धरानबाट भोजपुर आउँदै गरेको ना ४ ख ७३१७ नम्बरको यात्रुबाहक बसका सञ्चालक पर्वत तामाङलाई बिना कारण तिवारी भन्जाङ गाविसका गौतम राईसहितको १५ जनाको टोलीले मरनासन्न हुने गरी कुट पिट गरेको थियो ।

कुटपिट गर्नेलाई पक्राउ गरी भोजपुर जिल्ला प्रहरी कार्यलयमा ल्याए पनि उल्टै प्रहरी प्रशासनले पीडकलाई प्रश्रय दिने काम गरेकाले आफूहरुले विरोध स्वरुप आन्दोलनका कार्यक्रम सार्वजनिक गरेको संयुक्त बस व्यवसायी संघले जनाएको छ ।

घटनामा संलग्नलाई कानुनी कारबाही नगरिए सम्म बन्द फिर्ता नगर्ने संघले बताइएको छ । संयुक्त बस व्यवसायी संघ भोजपुर, सगरमाथा ट्याक्सी व्यवसायी संघ, ट्र्याक्टर संघ, नेपाल यातायात मजदुर संघ र नेपाल यातायात मजदुर सङ्गठन लगायतले प्रेस विज्ञप्ति जारी गर्दै बन्द गरेका हुन् ।

सोम, पुस ११, २०७३ मा प्रकाशित

यसमा तपाइको प्रतिक्रिया