धरान ,१४ मंसिर ।
धरानमा केही दिन यतादेखि चक्कू देखाएर एक युवाले चटपटेवालाहरु स“ग फिल्मीशैलीमा लुटपाट गर्ने गरेको पाइएको छ ।
पछिल्लो १० दिनयतादेखि धरानका विभिन्न स्थानमा ठेलामा राखेर चटपटे बेच्नेहरुलाई भुडीमा चक्कू तेस्र्याउँदै थैलाको रकम लुट्ने गरेको चटपटे व्यापारीहरुले बताएका छन् ।

सुरुमा आम ग्राहक जसरी नै चटपटे माग्ने त्यसपछि चटपटे बनाउन थालेपछि भुडीमा चक्कु तेस्र्याएर पैसा लुट्ने गरेको चटपटे व्यापारी श्याम चौधरीले बताए ।
लुटेरा रातो रङ्गको एभेन्जरमा हेलमेट र मुखमा मास्क लगाएर आउने गरेको चौधरीले बताए । चौधरीले आफनो गत मंगलबार र शुक्रबार गरी ४५ सय रुपैया लुटेर लगेको बताएका छन् ।

चौधरी जस्ता झण्डै सातजना भन्दा बढी चटपटे व्यवसायीहरु लुटिएपछि सामूहिक रुपमा इलाका प्रहरी कार्यालय धरानमा आज मंगलबार निवेदन दिएको चटपटे ब्यापारी बिजय जैसवालले जानकारी दिनुभएको छ ।

यसैबीच धरान–८ को होण्डा शोरुममा कार्यरत एक युवामाथि छुरी प्रहार भएको छ ।

सोमबार राति करिव साढे ७ बजेतिर शो रुममा कार्यरत मोरङ विराटनगरका सागर सरदार माथि छुरा प्रहार भएको हो । छुरी प्रहार गर्ने धरान–१६ का सागर लिम्बू रहेको बताइएको छ ।

गत शुक्रबार शो रुममा स्कुटी बनाउन ल्याएको विषयमा ग्राहक ग्राहकबीच झगडा हुने क्रममा शोरुममा कार्यरत युवाहरुले छुट्याउने प्रयास गरेका थिए ।

त्यही विषयलाई लिएर लिम्बूले इगो साधेको हुन सक्ने शोरुम सञ्चालक देव कुवरले बताउनुभयो । उहाका अनुसार सरदारलाई छुरी हान्ने क्रममा छल्दा देब्रे आँखाको भागमा काटेको छ ।

मङ्ल, मंसिर १४, २०७३ मा प्रकाशित