चीतवन , २२ असोज । दुई साताअघि चितवनको दारेचोकस्थित घोप्टेभीरबाट गाडीसहित वेपत्ता पूर्वगृहमन्त्री माधव घिमिरेका भाइ मोहनको शव आज बिहान फेला परेको छ ।

तनहुँको देवघाट ४ बगहीस्थित त्रिशुली किनारमा आज बिहान पूर्वमन्त्री माधवका वेपत्ता दुई भाईमध्ये मोहन घिमिरेको शव भेटिएको जिल्ला प्रहरी चितवनका डिएसपी दीपक श्रेष्ठले बताउनु भयो ।

त्रिशुली किनारमा शव देखेर स्थानीय माझीले प्रहरीलाई खबर गरेपछि गएको जिल्ला प्रहरी चितवनका प्रमुख वसन्त कुँवर नेतृत्वको प्रहरी टोलीले शव साथै भेटिएको परिचय पत्र र लाइसेन्सका आधारमा शव मोहनको भएको पुष्टी गरेको हो ।

अहिले शव फेला परेको स्थानमा जिल्ला प्रहरी तनहुँको टोलीले मुचुल्का उठाउने काम गरिरहेको डिएसपी श्रेष्ठले बताउनु भयो ।

असोज ९ गते मुक्तिनाथ दर्शन गरेर फर्कने क्रममा घिमिरे परिवार सवार गाडी घोप्टेभीरबाट त्रिशुलीमा खसेर बेपत्ता भएको थियो ।
घिमिरेकी आमासहित ३ को घटनास्थलमा मृत्यु भएको भएको थियो ।
पूर्वमुख्य सचिव समेत रहेका घिमिरे र उहाका दुई भाइ त्रिशुलीमा बेपत्ता थिए । एकसाता सम्म प्रहरी, सशस्त्र प्रहरी र सेनाको टोलीले खोजी गरेको थियो । घिमिरे र अर्का एक भाई अझै वेपत्ता छन् ।

शनि, अशोज २२, २०७३ मा प्रकाशित