गुटेरेस संयुक्त राष्ट्र संघको नयाँ महासचिव बन्ने लगभग निश्चित

एजेन्सी, २० असोज । पोर्चुगलका पूर्व प्रधानमन्त्री एन्टोनियो गुटेरेस संयुक्त राष्ट्रसंघको नयाँ महासचिव बन्ने लगभग निश्चित भएको छ ।
१० वर्षसम्म राष्ट्रसंघीय शरणार्थी नियोगको नेतृत्व सम्हालिसकेका ६६ वर्षका गुटेरेस आउँदो वर्षदेखि राष्ट्र संघको महासचिव बन्ने भएका हुन् । गुटेरेसले महासचिव बन्न युरोपियन कमिश्नर बुल्गेरियाकी क्रिस्टलिना जोर्जिवासहित ९ प्रत्यासीलाई पछि पारेका हुन् ।
राष्ट्रसंघको नयाँ महासचिवका लागि बुधबार सुरक्षा परिषदका १५ सदस्यले १० उम्मेदवारका लागि गोप्य मतदान गरेका थिए । मतदानमा कसैले पनि गुटेरेसको विरोध नगरेको बताइएको छ ।
सुरक्षा परिषदका १५ सदस्य मध्ये १३ ले गुटेरेसको पक्षमा तथा दुई सदस्यले नो ओपेनियनमा मत दिएका थिए । मतदानबाट चुनिएका उम्मेदवारको नाम राष्ट्रसंघको महासभामा पठाइने छ । महासभाले नै औपचारिकरुपमा नयाँ महासचिव नियुक्त गर्ने छ ।
दुई कार्यकाल राष्ट्रसंघको नेतृत्व गरेका वर्तमान महासचिव बान की मुनको कार्यकाल आउँदो जनवरीमा सकिँदैछ ।

बिहि, अशोज २०, २०७३ मा प्रकाशित

यसमा तपाइको प्रतिक्रिया