अग्रिम टिकट बुकिङ आज देखि ,१२ स्थानमा यात्रु सहायता कक्ष स्थापना

काठमान्डौ असोज ७ ।
आजदेखि दसैँमा उपत्यका बाहिर जाने लामो दूरिका बसको टिकट अग्रिम बुकिङ खुल्ला भएको छ । यातायात व्यवस्था विभाग, यातायात व्यवसायी र ट्राफिक प्रहरीको समन्वयमा टिकट बुकिङ सुरु गरिएको हो ।

पोखरा लगायत नजिकका जिल्लाका लागि भने केही दिनपछि बुकिङ खुल्ने नेपाल यातायात व्यवसायी महासंघका महासचिव सरोज सिटौलले जानकारी दिनुभयो ।

दसैँका लागि यस वर्ष व्यवसायीले नयाँ बस नल्याएका कारण उपत्यकाबाट बाहिरिने यात्रुलाई असहज हुनसक्ने अनुमान गरिएको सिटौलाले बताउनु भयो ।

साथै सवारी दुर्घटना नियन्त्रण गर्न नियम कार्यान्वयनमा कडाइ गरिने भएको छ । क्षमताभन्दा धेरै यात्रु नबोक्ने तथा लामो दूरीको बसमा अनिवार्य रूपमा दुई चालक राख्ने नियम कडाइका साथ पालना गराइने ट्राफिक प्रहरीले जनाएको छ ।

यसैविच अग्रीम टिकट बुकिङ खुलेसँगै सेवा दिन उपत्यकाका १२ स्थानमा यात्रु सहायता कक्ष स्थापना गरिएको छ । चाडपर्वको समयमा यात्रु ठगिने सम्भावना भएकाले यात्रु सहायता कक्ष स्थापना गरेको हो ।

महानगरीय ट्राफिक प्रहरी महाशाखाका अनुसार कलंकी, बल्खु, नयाँ बसपार्क, पुरानो बसपार्क, कोटेश्वर, चाबहिल, स्वयम्भू, सुन्धारा, नागढुंगा, जगाती, लगनखेल र तिलगंगामा यात्रु सहायता कक्ष हुनेछ ।

बढी भाडा लिन खोजे, ब्ल्याकमा टिकट बिक्री गरे तथा अन्य कुनै समस्या भए यात्रु सहायता कक्षमा उजुरी गर्न सकिने ट्राफिक महाशाखाका एसपी लोकेन्द्र मल्लले बताउनु भयो ।

सहायता कक्षमा ट्राफिक प्रहरीसहित यातायात व्यवस्था विभाग र यातायात व्यवसायीका प्रतिनिधि समेत रहने छन् ।

शुक्र, अशोज ७, २०७३ मा प्रकाशित

यसमा तपाइको प्रतिक्रिया

Loading...

अन्य समाचार समाचार

Like us On Facebook

Follow Us On Twitter