दशैमा बसको टिकट सात गतेदेखि खुल्ने , हवाई जहाजको सकियो

राजधानीबाट दशैमा बसहरुबाट उपत्यका बाहिर घर जाने यात्रुहरुको संख्या लाखौं हुन्छ । साथै हवाई यात्राबाट पनि थुप्रै यात्रुहरु गन्तव्यमा जान्छन् ।
यसै सन्दर्भमा सरकारले आगामी असोज ७ गतेदेखि अग्रिम टिकट  बुकिङको व्यवस्था गरेको छ ।

बसको टिकट असोज सात गतेबाट खुल्ने भएको छ भने निजी हवाई जहाजहरुको टिकट लगभग बुकिङ सकेको बताईएको छ । नेपाल एयरलाईन्सले मात्रै ओपचारीक रुपमा बुकिङ खोलेको छैन ।

 यातायात व्यवस्था विभाग र नेपाल यातायात व्यवसायी महासंघबीच दसैंका लागि भनेर ७ गतेदेखि अग्रिम टिकट काट्ने व्यवस्थाबारेमा आइतबार निर्णय भएको छ ।

महासंघका महासचिव सरोज सिटौलाका अनुसार असोज ७ गतेदेखि काठमाडौंको गौशाला, नयाँ बसपार्क, कलंकी, कोटेश्वर, सुन्धारा, बानेश्वर, चाबहिललगायतका स्थानबाट अग्रिम टिकट काट्ने व्यवस्था गरिएको छ । यस्ता स्थानमा यातायात विभागले नागरिक सहायता कक्ष पनि सञ्चालनमा ल्याउनेछ । यातायात व्यवसायीको शर्त मानेपछि असोज ७ गतेदेखि अग्रिम टिकट काट्ने व्यवस्था सम्बन्धी निर्णय भएको हो ।

सिटौलाका अनुसार मुग्लिङ्ग-नारायणघाट सडक खण्डको ३६ किलोमिटर खण्डमा भइरहेको सडक बिस्तारकाे काम दसैंलाई लक्ष्य गरी असोज १० देखि ३० गतेसम्म रोक्ने बिषयमा दुवै पक्षबीच सहमति भएको छ ।

यसैगरी कलंकी-नागढुङ्गा र नागढुङ्गादेखि नारायणघाट सडक खण्डमा भएका खाल्डा खुल्डी पनि पुर्ने बिषयमा सहमति भएको छ । त्यस्तै, अव्यवस्थित रुपमा रहेको रुट परमिटलाई पनि व्यवस्थित गरेर चाडपर्वको समयमा सवारी साधन सञ्चालन गर्ने बिषयमा सहमति भएको सिटौंलाले जानकारी दिए ।

विभागका प्रवक्ता वसन्त अधिकारीका अनुसार दसैंको समयमा यात्रुलाई ठगी हुनबाट जोगाउन विभिन्न स्थानमा नागरिक सहायता कक्ष स्थापना गर्नुका साथै नेपाल प्रहरी, ट्राफिक प्रहरी, यातायात कर्मचारी र मजदुरलगायतलाई स्वयम् सेवकको रुपमा परिचालन गरिनेछ । विभागले तोकेको भाडा दरमै टिकट काट्ने व्यवस्था गरेको छ ।

दसैंको समयमा दैनिक डेढ लाखको हाराहारीमा यात्रु काठमाडौंबाट बाहिरिने भएकाले हाल सञ्चालित बसले चाप थेग्न नसक्ने अवस्था छ । व्यवसायीले यात्रुको सुविधाका लागि आधुनिक सुविधा सम्पन्न बस थप्न तयारी गरेका छन् ।

सामान्य दिनमा दैनिक ६ सय बसबाट ४५ हजार यात्रु बाहिरिने गरेका छन् । छोटो दूरीमा भने दुई सय गाडी थप्ने तयारी छ । फूलपातीदेखि अष्टमीसम्ममा दैनिक करिब चार लाख यात्रु उपत्यकाबाट बाहिरिने गर्छन् । दसैं अवधिमा करिब २६ लाख सर्वसाधारणले उपत्यका छाड्ने अनुमान गरिएको छ।

सोम, अशोज ३, २०७३ मा प्रकाशित

यसमा तपाइको प्रतिक्रिया

अन्य विजनेस समाचार

Like us On Facebook

Follow Us On Twitter