मापसे गरी सवारी चलाउनेको कारबाहीबाट नौ लाख राजस्व सङ्कलन


चितवन, २५ चैत ।

प्रहरीले कडा कारबाही गर्न सुरु गरे पनि मादक पदार्थ सेवन गरी गाडी चलाउनेको सङ्ख्या भने घट्न सकेको छैन । चालु आर्थिक वर्षको अहिलेसम्म जिल्ला ट्राफिक प्रहरी कार्यालय चितवनले ९३४ वटा सवारीलाई कारबाही गरेको छ ।

उक्त कारबाहीबाट रु नौ लाख ३५ हजार राजस्व सङ्कलन गरिएको कार्यालयका प्रमुख रमेशराज भेटवालले बताउनुभयो । सबैभन्दा बढी मोटरसाइकल कारबाहीमा परेका छन् ।

कुल ८१२ वटा मोटरसाइकल कारबाही गर्दा रु आठ लाख १२ हजार राजस्व सङ्कलन भएको भेटवालले बताउनुभयो ।

अघिल्लो वर्षभरिको कारबाही सङ्ख्याभन्दा अहिले नौ महिना नसकिँदैको कारबाही सङ्ख्यामा वृद्धि भएको कार्यालयको तथ्याङ्कमा उल्लेख छ । गएको आवमा चितवनमा कुल ८२६ सवारीलाई कारबाही गरिएको र रु आठ लाख २६ हजार राजस्व सङ्कलन भएको थियो ।

यो वर्षको अहिलेसम्म सबैभन्दा बढी ८१२ वटा मोटरसाइकल, १७ वटा ट्रक, आठ वटा बस, कार जिप ६९ वटा, ट्र्याक्टर २४ वटा र ट्याम्पो चार वटा कारबाहीमा परेका छन् ।

बुध, चैत्र २५, २०७१ मा प्रकाशित

यसमा तपाइको प्रतिक्रिया